سنة الإمتياز

مرحبًا جميعا ! ألف مبروك التخرج و انتهاء مشوار الست سنوات بكل مافيه .. و أهلًا بكم في السنة اللي كلنا ماندري ايش نبغى و ايش مطلوب مننا .

ترددت في كتابة هذه التدوينة الآن بحكم إني ما انتهيت من سنة الامتياز و باقي لي 3 أشهر تقريبا ، لكن قلت أفضل قبل ما أنسى التجربة أتكلم و أنا باقي فريش . رح أجاوب على كل الأسئلة اللي جتني من الانتيرنز الجدد و إذا عندكم أي اسئلة اكتبوها بالكومنتس تحت و رح أجاوب عليها فوراً .

أولاً : ماهي سنة الإمتياز ؟ هي السنة السابعة من كلية الطب ، 12 شهر بالضبط تُعتبر فيها طبيب متدرب ( قبل الطبيب المقيم برتبة ) و لكن ما يكون عندك وثيقة التخرج لحد ماتخلصها بنجاح .

ثانياً : ما الهدف من سنة الإمتياز ؟ الأهداف كثيرة نقدر نحصرها في التدريب ، على كل شيء ، مطلوب منك بعد إنتهاء هذه السنة تكون متدرب جيد على أساسيات معينة ، هستوري تيكنق ـ اكزامنيشن في كل التخصصات ، العمل الجماعي ،مهارات التواصل و نقدر نقول هي السنة اللي تُصقل فيها مهاراتك الطبية من كل النواحي علميا و اجتماعيا .

ثالثًا : ماهي مهام طبيب الإمتياز ؟ مهامك محددة ، و معرفتك لمهامك في كل فريق طبي حق من حقوقك حتى مايسوي لك أحد ابيوز ، أو ماتتعلم زين أو حتى ما تقع في مشاكل .. تختلف المهام من تيم لتيم و من تخصص لتخصص و من مستشفى لمستشفى و لكن لها بيزلاين معين و هي : 1- حضور الاجتماع الصباحي و المشاركة فيه بالمناقشة إن أمكن . 2- حضور الراوند مع الفريق الطبي و أخذ حالات مريضين إلى 3 مرضى تكفي و قد تزيد اذا التيم حالاته كثيرة 3-إذا أخذت حالة تكون مسؤول عن أخذ التاريخ المرضي و الفحص السريري + كتابة البروقرس نوت وهي نوتة تكتب فيها تطور حالة المريض كل يوم من يوم دخل لحد ما يطلع + كلاركنق أحيانًا و معناها الفحص الأولي للمريض أول ماجاء المستشفى + تدخل الأدوية و الفحوصات و الأشعات المطلوبة في السستم بدون ما تكتبها أنت من راسك ، يعني الرزدنت بعد مايناقش معاك انت و الاستشاري الحالة يجي يكتبها بالدوز الصح في الاوردر و تجي انت تدخلها في السستم . 4- حضور الأونكولات و ماتزيد عن 3 بالعادة بالشهر . 5- أحيانًا لما تكون انترستد في التخصص و تبغى تثبت نفسك مافيه مشكلة تقدم حالة في الصباح ، أو تسوي برزنتيشن و تقدمه للتيم في يوم . 6- حضور العيادات مع الطبيب و تسوي الفحص و تاخذ هستوري و تناقش و تكتب وصفات و هكذا ، كمساعد للطبيب .

ماسبق هي واجبات عليك لازم تسويها كطبيب امتياز عشان تحلل راتبك أمام الله و تتعلم و تتدرب مزبوط , غير كذا تعتبر مهام زائدة ولك الحق تعترض بأدب إنو من حقك ماتسوي ذا الشيء .

رابعًا : حقوق طبيب الإمتياز ؟ حقوقك كحقوق أي طبيب ، الإحترام و التقدير و محد بيقل أدبه عليك إن شاء الله اذا وضعت حدود لك من البداية و أظهرت احترافيتك و احترامك ، من حقك تتعلم و تسأل و تشارك خاصًة تحت استشاري التيم حقك .. محد له حق يضحك عليك أو ينتقص من اسئلتك مهما كانت تفاهتها ، أصلا من واجبات التيم كامل إنهم يعلموك كل شيء من أتفه الأشياء مثل كيف تفتح السستم ، لحد أعقد الأشياء الكلينيكل . من حقوقك أيضاً انو يعطى لك تقييم شهري و انك تطلع على درجتك في التقييم ، و تاخذ أوراق التقييم هذي و تجمعها و تعطيها الجامعة بعد ماتخلص امتياز . من حقوقك انك تاخذ اجازات ، عندك شهر كامل طوال السنة تقدر تاخذه كيفما شئت . من حقوقك انو يدفع لك شهريًا 9200 ريال و مع المعيشة تصير 10000 و شيء ، لو نقص ريال واحد بس تقدر تتواصل مع المالية بالجامعة و تاخذ حقك . و عموما ، في كل جامعة فيه مكتب امتياز .. خلي ايميلهم ووسائل التواصل معاهم عندك دائماً و أي مشكلة تواجهك تواصل معاهم بدون تردد . ولو كانت المشكلة صغيرة و بتنحل بدون مكتب الامتياز , توجه إلى مدير البروقرام في الروتيشن اللي انت فيه و تكلم معاه .

خامسًا : مصطلحات ممكن تكون غريبة عليكم في الامتياز ( روتيشن : معناها الفترة اللي بتقضيها في تخصص معين مثلا روتيشن باطنة يعتبر شهرين يعني شهرين رح تقضيها مع الباطنة ) ( مورننق ميتنق : اجتماع صباحي لكل التيمات في التخصص يناقشون فيه الحالات الجديدة اللي تنومت و أحياناً يسووا برزنتيشن او تيتشنق ) ( راوند : الجولة اللي يسووها الدكاترة في الأقسام الصباح و تكون بعد الميتنق و يشوفوا فيها المرضى و هذي فرصتك أنك تقدم حالاتك للاستشاري و تقرا له اللي كتبته و تعرض عليه تطورات حالات مرضاك ، فيه أحيانا بري راوند وهو قبل يبدأ الراوند الحقيقي بنص ساعة تقريبا تروح تشوف مرضاك و تكمل اوراقهم و تجهز نفسك عشان تقدم ) ( أونكول : تكون متواجد في المستشفى مع المقيم الاونكول لمدة 24 ساعة و بعض التخصصات 12 ساعة و تقدر تعرف كم اونكول و كم مدته من المنسق حقكم في الروتيشن ، واجبك فيه تكون مع الرزدنت تساعده في الهستوري و الاقزامنيشن في كم بيشنت و تكتب بروقرس نوت و تطلب الفحوصات و تسوي فيو لها و بس ترجع الغرفة ترتاح الين يجوا مرضى جدد ، و حاولوا يكون ماتاخذوا كل البيشنت يعني مثلا تعاونوا مع الرزدنت انه يعطيك كم بيشنت كل شوي ويجي هو يشيك بعدك عليهم ) ( بليب : بيجر يكون معاك وقت الاونكول فقط و له رقم إذا احتاجوك الطواريء أو الطبيب المقيم رح يتصلوا عليه ، يجيك فيه رسالة ان البليب الفلاني دق عليك ، تشيل التلفون و تدق على هذا البليب و تسأل أي قسم و ايش يحتاجوك فيه ، اذا مافهمتوا كيف اسألوا الدكاترة أو سكرتارية القسم عنه ) ( بوست كول : هذا بعد ماتخلص الأون كول لك حق ترجع البيت طوالي و ماتحضر الراوند و تتعب نفسك باقي اليوم لأنك سبحان الله إنسان و تتعب و كذا ) ( بروقرس نوت : ورقة تطور حالة المريض و لها طريقة كتابة معينة إذا ما تعرفوها اسألوا الرزدنت و بيشرحوا لكم طريقتها ) ( أوردر شيت : هذي ورقة يكتب فيها الطبيب أي شيء يطلبه للمريض من أدوية و تصوير و فحوصات و تُكتب من قبل الطبيب المقيم و تختّم و انت وظيفتك تدخلها في السستم إذا هي ورقة مريضك ) ( السستم : لكل مستشفى سستم معين و هذي أبيخ نقطة في الامتياز ، كل مستشفى تتدرب فيه لازم تقضي أول أسبوع ضايع في السستم و تتعلم طريقته ، الحل أمسك اي انتيرن مطول في المستشفى و خليه يشرح لك السستم ، و مو عيب إذا بعدين ضيعتوا فيه حتى النيرسز أسألوهم لأنهم ماشاء الله يعرفوا كل صغيرة و كبيرة و بيساعدوكم ) ( ساين إن و ساين آوت : تسجيل الدخول وهو التوقيع الصباحي قبل الميتنق و لازم في كل تخصص تقريبا أما الساين آوت هذا توقيع الخروج و بياخة مرة يعني عادي تكون مخلص من 11 و التوقيع 3 و تجلس كذا تتأمل ، الساين آوت مو دايم موجود أمانةً ) ( ايفاليويشن : هذي ورقة تقييم ترسلها لكم الجامعة و تطبعوها لكل روتيشن و تاخذوا تقييم من الكونسلتنت ، ما أعرف ايش اهميتها صراحة بس ما أعتقد انها مهمه الا انك تكون اجتزت كل الروتيشنات يعني مايكون عندك تقييم سيء لدرجة انك ما اجتزت عشان مايخلوك تعيد الروتيشن بعدين ) ( الكتف : هذا روتيشن اختياري لك تختلف مدته من أسبوعين إلى شهر و لك الحق تختار أي تخصص في أي مركز ، غالبًا الناس تخليه للتخصصات اللي هم انترستد فيها عشان يثبتوا نفسهم أكثر لو كانت من ضمن الروتيشنات الأساسية ، أو عشان يجربوا التخصصات لو ماكان عندهم روتيشن أساسي فيها زي التخصصات الفرعية مثل النيورو و الأوفثا و غيرها )

سادسًا : كيف أتعلم كويس من سنة الإمتياز ؟ هذي نقطة مهمة جدا ، بعض المستشفيات التعليم فيها سيء جدا ف خذ فيدباك من الامتياز والرزدنت اللي قبلك عن المراكز ، الامتياز فرصة حلوة انك تتعلم مره مره ، بالنسبة لمنطقة عسير ، مستشفى عسير و المحالة هي أفضل مركزين ممكن تتعلم فيها ، العسكري بعض التخصصات فيها تعليم جيد و بعضها لا و الله يخلوا هايم على وجهك بشكل ينرفز لدرجة تحس انك تداوم ع الفاضي .

نطموا يومكم و نومكم بحيث مايجي المورننق ميتنق و انتم فيكم نوم زيي أول كم شهر ، المورننق ميتنق ممكن يكون ممل أحيانا بس غالبا هو فرصة جيد للتعلم ، تعلم كل شيء مو بس كلنكل ، تشوف كيف الأطباء يعطوا رايهم و يناقشوا بطريقة علمية محترمة و كيف اختلافهم في التخصصات و في الخطط العلاجية شيء جميل و محترم و متكامل .

خلال الراوند أو الاونكول خلوا معاكم دفتر صغير سجلوا فيه كل مريض + غرفته + رقم ملفه + التشخيص .. و بعدين آخر اليوم ارجعوا أقرأوها وشوفوا الاشياء اللي ماعندكم معلومات عنها و اقرأوها في ميدسكيب أو اسألوا الاستشاري عنها

ما أحب كلمة أنا انترستد و مو انترستد ، أحسها ضيعت علي فرص تعلم كثير .. لما جيت الأي آر و عرفوا إني مو انترستد ماعلموني مزبوط و فيه أشياء كنت اتمنى أتعلمها عشان أكون فزشن كويس بغض النظر عن تخصصي .. فحاولوا ماتعطون أي أحد فكرة عن الانترست حقكم و قولوا احنا نبغى نستكشف تخصصاتنا بالتجربة .

بشكل عام ، حاول تسأل أي شيء يجي في بالك و اذا ماحصلت على اجابة اسأل اللي رتبته أعلى و هكذا ، ناقشوا و اسألوا عن تشخيص الحالات و كيف دخلت من الإي آر و كيف كان البرزنتيشن و كيف ممكن يكون البروقنوزس ، اذا فيه بروسيجر معينة و حسيتوا انكم حابين تتعلموها عادي احضروها مرة و اطلبوا الدكتور المرة الجاية أنكم تشاركون فيها أو تسووها ، و طبعاً تحت اشرافهم عشان يكون كل شيء بروفشنل لأنها حياة مريض في النهاية .

بالنسبة لأول شهر في الامتياز يفضل تخليه تخصص خفيف عشان تتعود على الجو العام للامتياز و الدوام و المستشفى و ماتكون اغلاطك قوية فيه ، يعني يكون تمهيد . بالنسبة للالكتف حطوها قبل شهور التقديمات عشان تستفيدوا و تثبتوا نفسكم في تخصصاتكم اللي حابينها . اذا حابين تعرفوا مواعيد التقديمات و خط زمني للسنة اللي انتوا فيها زوروا موقع الهيئة ( HERE )

سابعًا : أهم نقطة للأسف الامتياز نحسبها هني مون الطب بس كانت أكثر سنة فيها ضغط نفسي و تغير للجو بسبب النقاط اللي بقولها الآن وهي مهام لازم نخلصها خلال الامتياز , و هي كالتالي :

• دورات أساسية ( للكل BLS ) ( للجراحة : ATLS , ACLS .. ETC ) و هذي تقدروا تاخذوها من و انتوا طلاب .
• الاعداد لاختبار الهيئة SMLE
• طريقة الاختبار و كيفية اختيار وقته
• الاعداد للمقابلات
• المقابلات الشخصية

بالنسبة لآخر 4 نقاط رح أخصص لها تدوينة منفصلة رح أجهزها قريبًا بإذن الله لأن الحديث فيها يطول لكن عموما الاعداد للاختبار يبدأ قبله بشهرين إلى 3 أشهر ، ما أحبذ تبدأوا قبلها أبدًا .

أخيراً ، بعطيكم نقاط و هاكس ممكن تساعدكم عشان تنجون من هذه السنة و مريت فيها و تمنيت إني عرفت حلها من قبل :

1-فيه قروبات تسويها تواس وهي تجمعات للمذاكرة ، للتقديم و غيرها .. جدا مفيدة و أكيد بتحصلوا أحد يدخلكم فيها .. أدخلوها من باب العلم بالشيء بس لا تاخذوا كل شيء فيها على محمل الجد و تأكدوا من كل معلومة تطرح فيها لأن فيه ناس ماتبغى الخير لغيرها للأسف .

2- بيئة العمل غير عن بيئة الدراسة كثير .. كلنا عندنا خيال أننا بنصير د.هاوس و كل شيء ايرجنت و آكشن بس للأسف العمل فيه ملل كثير خاصةً لما يكون التيم كله ناس تحب سدة النفس و التحبيط .. و ركززززوا .. زملاء العمل ليسوا أصدقااااء .. صداقاتك انتهت في الجامعة خلاص كل واحد بتقابله الآن هو كووركر و زميل عمل فقط و ممكن فجأة يقلب عليك ف أعرفوا حقوقكم و كونوا guarded دائمًا . فيه ناس أبيوزف مره و ماتحب الخير لغيرها و ماتبغاك تتعلم أو تستفيد و ترمي الشغل عليك بدون حتى تفكر فيك ، مو عشان شيء بس حسد في قلوبهم .. مره كنت في روتيشن و كانوا الرزدنت يبغوني بس أدخل الداتا في السستم و ماعلموني و لا شيء و اذا سألت طنشوني ( كل التيم كان كذا حتى الاستشاري ) و مره كتبت كلاركنق من قلبي مع أنهم قالوا لي محد يقراه بس لأني أحب عملي يكون كامل من باب الأمانة و باب البروفيشانلزم .. و لما جيت أبغى أقدم الحالة خلتني الرزدنت أروح أجيب ملف من آخر الدنيا و لما رجعت لقيتها مقدمة حالتي :))))!!!! و تقول ليش ماجيتي من قبل ؟ مع أنها هي اللي رسلتني بس من جهلي بحقوقي ما طنشتها و خليتها تجيب الملف بنفسها ، كنت أحسبه تيم وورك و عادي بس أحيانا ماينفع تكون كذا .. لازم تكون حازم لأنهم حتى هم عندهم ايفالويشن و يبغوا يثبتوا نفسهم قدام الكونسلتنت بس لاتخلي أحد يسويها على حسابك .

3- الأمانة في أداء كل حاجة .. إذا نبغى نكون فزشن كويسين و مانكون من اللي ينحش فيهم في المجالس على أغلاطهم و سوء الخدمات الصحية اللي يقدموها لازم نكون أمينين في كل حاجة نسويها ، حطوا في بالكم أن ربي هو اللي عارف حتى لو التيم أو الدكاترة اللي معاك ماكانوا مهتمين أنهم يسووا تشك مثلا على كل حاجة في الورقة ، خليك غير و شيك على كل شيء .. عشان بس المريض لأنك هنا عشانه هو وهو فقط . هو أمانة عندك و انت مسؤول عنه أمام الله يوم القيامة و ان صغر عملك ، فيزيكالي و منتالي و سوشيالي كلها أشياء لازم تسأل عنها . في الكلية يعلموك كيف تاخذ هستوري معقد و بالحبة عشان الدرجات و لما تجي المستشفى تلاقيهم زين يسألون ايش اسمك للمريض و الاكزامنيشن أي كلام و الورقة ماتتعبى و يطنشوا نص الأشياء فيها ، بعدين يقولوا ليييييش الطب متخلف في بلدنا .. لأننا نتعلم الشيء و نتركه في الكلية و بين صفحات الكتب . و أنت تقدر تصنع الفرق مهما كان الشيء اللي سويته صغير ، أقلها أديت الأمانة اللي عليك .

4- لا تسمح لأحد بتجاوز حدوده معاك و استخدامك عشان يريح نفسه ، و لا تحط نفسك في مشاكل مع أحد و حل مشاكلك بأدب و هدوء .. دائما دااائمًا توجه للسينيورز و قول لهم مشكلتك مع أي شخص بأدب و احترام و صدقني في كل مكان الصالح و الطالح و بتلاقي ناس تنصفك مع اللي ما أنصفك . و ابتعدوا عن الرد فلاقز في هالسنة .. مثلا تجاوز الحد المعين من الغياب .. أنا صراحة أغيب لما أكون تعبانة أو عندي ظروف و ما أقول إني واااو حضرت كل يوم في كل روتيشن ، بس ما تتجاوز عدد الأيام المسموح لك بالغياب فيها ، أيضًا لا تدخل في نقاش مع أحد من الستاف عشان تثبت انك صح الا في حالة كان في حق من حقوقك أو لإنقاذ المريض ، غيرها طنش و سلك . لا تسحب على الاونكول إذا اعطوك اونكول لأنه أكيد بينسأل عنك ، أصلا انتوا في النهاية بتطلبوا ايفالويشن و اذا كنتوا غايبين طول الوقت محد بيقيمكم أو ممكن يعيدوكم الروتيشن كامل و انتوا في غنى عن هالشيء .

5- The burnout للأسف ، في هذه السنة و ماكنت أنا الوحيدة بالعكس كل الانتيرنز اللي أعرفهم جاهم برن آوت فضيع .. النفسية تنزل في الأرض و الطموح و الشغف يختفي و تحس انك مسجون الشغل للأبد خلاص انتهت الحياة و إنها غلطة عمرك إنك دخلت طب .. و لا شيء يرجع الحماس فيك و تحس بالضغط من كل جهة حتى حياتك الاجتماعية تتأثر لأنك الآن ماصرت لوحدك و on your own فقط تذاكر و تعدي و تنبسط بالدرجات و خلاص ، لا ، صرت تشتغل مع تيم و لازم تتحمل ذا التيم بكل مافيه من عاهات بشرية و ممكن تتعامل حتى مع مرضى أو أقارب مرضى مايقدرون و ممكن يوما من الأيام يكونوا سبب الضغط النفسي عليك . للأسف اني مريت بالبرن آوت و جلست أعاني و لازلت أعاني منه و لكن قرأت كم مقال و شفت كم فيديو وأتمنى تساعدني و بإذن الله أطلع منه و أكتب لكم عن كيف تتعاملوا معاه لو جاكم و إن شاء الله مايجيكم .

أتمنى أكون أفدتكم .. أنا موجودة لمساعدتكم دائمًا و لأي أسئلة أتمنى تكتبوها في التعليقات تحت عشان أجاوب عليها و يشوفها الكل و يستفيد . و انشروا رابط التدوينة لكل الانتيرنز المهتمين .

انتظروا تدوينات أخرى قريبا عن الاختبار و الاعداد له بإذن الله .

بالتوفيق يادكاترة .